أعلن المخرج محمد سامي اعتزاله الدراما التلفزيونية في منشور له عبر حساباته الرسمية على «فيسبوك» و«إنستجرام».
وكتب محمد سامي: «وداعا الدراما التلفزيونية.. السنة دي كانت آخر أعمالي التلفزيونية، واللي فيها بودع المسلسلات، رحلة طويلة حولي ١٥ سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير و مع شركات و قنوات كلها مهمة، و كان دايما الجمهور بيشجعني، سواء بردود الأفعال أو بتصويته ليا في الجوائز، و أي نجاح حققته كان بفضل ربنا و الجمهور، يمكن المقربين ليا عارفين إني واخد القرار ده من فترة وهو إعتزال الإخراج التلفزيوني و لكن كنت بنتهي من التزامات موقعة مع شركات ونجوم والحمد لله انتهيت منها وكان آخرها ٢٠٢٥».
وأضاف: «معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي و من الوقوع في فخ التكرار ودائرة المتوقع والملل، والوحيد القادر علي الدوام هو الله وحده ، الحمد لله أخر عملين ليا إش إش و سيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين و مثقفين و يقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة و بشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقي استحسان الجمهور أو إعجابهم في الأخر الفنان دايما بيجرب و الفنون جنون زي ما بيقولوا، أدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان و أجلتها كتير لحد مالقيت نفسي بكبر و خايف يفوت العمر قبل ما أعمل حاجة نفسي فيها».
وأكد «سامي»: «مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه و عايز يجربها بس محتاج عيلة تسانده علي اتخاذ قراره، كل التوفيق لكل زمايلي و بحبكم و بشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة».
وحرص الفنان تامر حسني على دعم صديقه محمد سامي وكتب في تعليق: «أوعى تكون عايز تبعد عشان أي إحباط جايز يكون فعلاً في بعض المشاهد اللي الناس انتقدتها و أنا شخصياً استغربتها شويه وقولت جوايا أنك مش محتاج تعملها أصلاً لأن عندك الحقيقي و الأهم بس على رأيك الفنون جنون أحياناً فكرة مجنونة تنال الإعجاب وفكره لأ… بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مرة ويمكن الحظ محالفكش أوي في عمل ولا ٢ على مدار ١٤ سنة ودي حاجه مينفعش الجمهور ينساهالك أنت قدمت مسلسل آدم اللي جمع كل المصريين و كل الوطن العربي يتفرجوا عليه زي ماتشات الكورة بسبب أنه اتكلم عن قضية تخص كل الوطن و كان بدايه لصورة جديدة أول مرة كانت بتتقدم في مصر و بعدها سبق الإصرار وحكاية حياة اللي كانوا نقلة كبيرة في ديكورات الدراما المصرية وبعدين الأسطورة والبرنس وجعفر العمده اللي حققوا نجاحات ساحقة و كانوا أعلى نسبة مشاهدات في الدراما بشكل عام وبعدهم نعمة الأڤوكاتو وإش إش و سيد الناس اللي برضو كل واحد فيهم يا أعلى مشاهدة يا تاني أعلى مشاهدة هزعل منك لو هتمشي محبط و أنت أنجح حد».
كما كتبت الفنانة وفاء عامر: «خسارة كبيرة بجد ابني الغالي أرجو إلا تتسرع، ولكن اعتبرها فترة نقاهة لإعادة ترتيب الأوراق لتقديم عمل بمنظور آخر».
الفنان إيهاب فهمي شارك صورة له مع محمد سامي عبر «إنستجرام» وكتب: «مهما كان قرارك فوجودك مهم للفن وابتعادك لفترة خسارة الإنسان والفنان والأخ والصديق محمد سامي أتمنى ألا يحدث».
*صورة من الصفحة الرسمية للمخرج محمد سامي على فيسبوك
