“ياما حمامى سرح ويا حمام الواد على” واحدة من أشهر أغانى الفلكلور الشعبى التى طالما سمعناها فى الأفراح المقامة خصوصاً فى القرى الريفية والصعيد، ومن أشهر الفنانات التى عرفن بالأغانى الشعبية كانت الفنانة خضرة محمد خضر والفنانة جمالات شيحة، فكانت لكل منهن حفلات شعبية يحضرها عدد كبير من عشاق الفن الشعبى وخرج من تحت إيديهن فنانات وفرق شعبية كثيرة ومن ضمنهن الفنانة الشعبية نورا صبحى التى عرفت بأغانيها الشهيرة فى الأفراح ومنها “ياما حمامى سرح ويا حمام الواد على.. وأما نعيمة.. وأيوة ولا يا حبيبى يا عبده”، واشتهرت بحفلاتها الشعبية مع زوجها الريس عارف القناوى وهو من عمالقة الفن الشعبى في الصعيد”.
وفى حوار “اليوم السابع” مع الفنانة الشعبية نورا صبحى فتحت صندوق ذكرياتها وأشهر الأفراح والحفلات الشعبية التي أحيتها وتدريبها على أيادى عمالقة الفن الشعبى، قائلة “أنا من الصعيد ولكنى جيت مصر من صغرى، واتربيت في عيلة فنية من وأنا عندى 9 سنين كنت بغنى وبطلع مع عمتى صبيحة فى الأفراح الشعبية وأغنى معاها ومع فرقتها، وفى فرح من الأفراح كانت الفنانة خضرة محمد خضر موجودة ولما سمعتنى قالت لى إنتى صوتك جميل أوى ولازم تطلعى معايا وتغنى واعلمك تمسكى شغل وتطلعى أفراح معايا وفعلا اتعلمت على إيديها وكانت بتدربنى وطلعت معاها أفراح كتير وكانت معتبرانى بنتها وبتقول كده لكل الناس وانا كنت بحبها أوى وبالنسبة لى هي حاجة كبيرة أوى، وكانت دائما تقولى خليكى راجل وخليكى متينة على المسرح متخافيش من أى حاجة ولاتخافى من الجمهور”.
وأضافت: “كنت في فرح شعبى وبغنى على المسرح مع الفنانة خضرة أغنية “يا مدلع يا حلو يا أبو رمش مكحله”، وشافتنى الفنانة جمالات شيحة هناك وأول ما سمعت صوتى قالت لى لأ أنا مش هسيبك انتى لازم تبقى معايا وفعلاً من اللحظة دى وأنا والحاجة جمالات مع بعض في الأفراح دايماً، وطبعا عيشت معاها ومكنتش عايشة مع أمى لأننا مكناش بنلاحق على الأفراح، وكنت بروح أزور أمى كل 5 شهور وأشوفها وأقعد معاها وأديها الفلوس اللى اشتغلت بيها”.
وتابعت “وانا عندى 25 سنة عملت فرقة وبدأت أطلع الأفراح لوحدى والناس كانت بتطلبنى بالاسم وطلعنا برا مصر أنا وفرقتى طلعنا الإمارات والدنمارك وفرنسا، وعملت 18 شريط كاسيت وأول شريط عملته كان “أيوة ولأ يا حبيبى يا عبده”، وفى فرح من ضمن الأفراح اللى روحتها قابلت الريس عارف القناوى وعيلته أبوه واخواته وهما طبعا عمالقة الفن الشعبى في الصعيد والناس بتعشق أغانيهم والأفراح اللى بيروحوها، واتعرفت على الريس عارف وطلب إيدى وفعلاً أتجوزنا ومن هنا بدأت رحلتى معاه في الغناء وطلعنا حفلات وأفراح كتير مع بعض وأفراح صعايدة وهما ناس بجد بتحب الفن الشعبى، وغنيت معاه أغنية “واحد بس” والناس كلها كانت تطلع ترقص قدامنا وبتبقى مبسوطين”.
واستطردت حديثها قائلة: “حاليا عملت فرقة للبنات بس وبنلبس الزى الفلاحى والإكسسوارات وبنطلع حنة وكتب كتاب وتنجيد وبنحى أغانى الفلكلور القديمة وأنا بغنى والبنات بتردد ورايا وبيرقصوا مع البنات والناس بتبقى مبسوطة بينا”.
وأنهت حديثها لـ”اليوم السابع” قائلة: “أنا آه متعلمتش ومابعرفش أقرأ وأكتب لكن عندى موهبة الغناء وألفت أغانى كمان، ونفسى الفن الشعبى يرجع تانى لكن مابقاش فيه فن شعبى ولا أفراح شعبى زى زمان”.
شريط كاسيت
الفنانة الشعبية نورا صبحى
الفنانة نورا فى منزلها
صور الفنانة نورا
صورة للفنانة نورا قديما
فرقة شعبية
نورا
الريس عارف القناوى
جمالات شيحة
خضرة محمد خضر
