نجمة متميزة، صنعت لنفسها مكانة كبيرة عند الجمهور فى مصر والوطن العربي من خلال أعمالها الغنائية و أدوارها الفنية المختلفة التى تقدمها ومنها، «الفرح، بوبوس، كباريه، جعفر العمدة، العتاولة، اللعبة، 365 يوم سعادة، حلم عزيز، خليج نعمة، وتامر وشوقية» وغيرها.
«الأسبوع» التقت الفنانة مي كساب فى حوار خاص، تحدثت خلاله عن مسلسلها الجديد «نون النسوة» بموسم رمضان 2026، وتفاصيل شخصية «شريفة» التى تقدمها خلال المسلسل، والسر الذى جذبها للمشاركة فى العمل، وأجواء التصوير، والمفاجآت الجديدة التى يقدمها مسلسل «اللعبة» للجمهور فى الجزء الخامس، وسبب إصرارها على عدم الابتعاد عن الغناء، وكواليس فيلمها الجديد «مؤلف ومخرج وحرامي» الذى يعرض حاليًا بدور العرض، ونوعية الأدوار التى ترغب فى تقديمها للجمهور خلال الفترة القادمة.
فى البداية.. حدثينا عن مشاركتك في مسلسل «نون النسوة» بموسم رمضان 2026.
سعيدة جدًا بالتجربة دي، لأنها مختلفة وفيها أبعاد إنسانية وفنية حقيقية والمسلسل قائم على شخصيات نسائية قوية، وكل واحدة ليها حكايتها.
– ماذا عن دورك فى المسلسل؟
أجسد شخصية «شريفة»، وهي استايلست لنجمة كبيرة تجسدها الفنانة سيمون، ونفسها تبقى فنانة مشهورة. الشخصية فيها طموح، وفيها صراعات داخلية، وفيها مفاجآت، خصوصًا إن في «تويست»، أو تحول، في منتصف الأحداث قد يسعد به الجمهور.
– ما الذى جذبك للمشاركة فى «نون النسوة؟
النص أولًا. وأكتر حاجة شدتني هي بناء الشخصية والتفاصيل المكتوبة بدقة. ووجود إبراهيم فخر كمشرف عام خلى كل حاجة “متظبطة”، والمجهود اللي اتبذل في السيناريو واضح جدًا.
– ماذا عن كواليس التصوير؟
الكواليس كلها حب، وأغلب الفريق إخواتي وأصحابي واشتغلنا مع بعض قبل كده، زي “سيمون وهبة مجدي ومحمد جمعة”. كمان في ناس جديدة كسبتهم كإخوات جداد، وده مخليني حاسة براحة كبيرة. أنا متفرغة تمامًا للمسلسل ومش بصور أي حاجة تانية جنبه.
– هل مشاركتك فى «دراما رمضان» لها طابع خاص؟
أكيد.دراما رمضان لها نكهة مختلفة، لأن الجمهور بيكون متجمع قدام الشاشة، وبيتابع يوميًا، وده بيحملنا مسؤولية أكبر. لكن في نفس الوقت، دراما خارج رمضان بقت ليها أهمية كبيرة، وبتدي مساحة أوسع للتجريب.
– ماذا يحمل الجزء الخامس من مسلسل «اللعبة»؟
الجزء الخامس مختلف ولطيف ومليان مفاجآت. بذلنا مجهود كبير جدًا، وإن شاء الله نكون عند حسن ظن الجمهور اللي بيحب المسلسل وبيتابعه من أول جزء.
– ما سر استمرار نجاح «اللعبة»؟
الروح. لأن العمل معمول بحب، والكيميا بين فريق العمل حقيقية. كمان الشخصيات بقت قريبة من الناس، وده سر الاستمرار.
– ماذا عن فيلمك الجديد «مؤلف ومخرج وحرامي» الذى يعرض حاليا بدور العرض؟
تجربة مهمة جدًا بالنسبة لي، لأنه يمثل عودتي للسينما بعد غياب استمر سنوات. لما قريت السيناريو لأول مرة حسيته مختلف وفيه روح خفيفة ولطيفة، وشخصيتي فيه جديدة عليّ، وده كان سبب حماسي الأساسي.
– تجسدين في الفيلم شخصية «منى» الكوافيرة.. كيف كانت استعداداتك لهذا الدور؟
شخصية “منى” كوافيرة فاتحة صالون في بيتها وبتحاول تساعد جوزها السيناريست الطموح، وسط مواقف كوميدية كتير، التحضير للدور أخد وقت ومجهود، خصوصًا إني حبيت أكون واقعية جدًا في التفاصيل، استعنت بكوافيرة علشان تعلمني استخدام الأدوات، إزاي أمسك المكواة، وإزاي أتعامل مع الشعر بشكل صحيح، لكن في نفس الوقت رفضت أقلد حد بعينه. أنا بحب أقدم الشخصية بروحي وبطريقتي.
– هذا الفيلم يجمعك بالفنان أحمد فتحي فى تعاون متكرر.. ما رأيك فى التعاون بينكما؟
«فتحي» أخ وصديق قبل ما يكون زميل، اشتغلنا مع بعض في أفلام كتير وأجزاء سابقة من «اللعبة»، ووصلنا لمرحلة إن التفاهم بينا بقى تلقائي، الكيميا دي نعمة كبيرة لأي عمل، خصوصًا في الكوميديا.
– وصفتِ الكوميديا سابقا بأنها من أصعب الفنون.. لماذا؟
لأن الضحك مش سهل، ومش أي «إفيه» يضحك الناس، الكوميديا محتاجة إيقاع وحس وتوقيت، وكمان لازم يكون فيها رسالة أو حالة إنسانية، وأحاول دايمًا أقدم كوميديا تخلي الناس تضحك وفي نفس الوقت تحس بحاجة حلوة.
– هل انشغالك بالتمثيل يعني انك تخليت عن الغناء؟
الغناء جزء مني، و”مش هسيبه”، أنا بحب الغنا وبعتبره مساحة تانية للتعبير. طرحت مؤخرًا أغنية «هتعيشوا من غير رجالة إزاي» مع أوكا، وكان التفاعل عليها جميل جدًا.
– كيف ترين تجربة الغناء مع أوكا؟
تجربة مريحة جدًا، لأن بينا تفاهم كبير، الناس حست بالعفوية والروح اللي في الأغنية، وده أسعدني.
– وقدمتِ أيضًا أغنية دعائية لفيلمك؟
بالفعل، أغنية «موجوعة منك» دعائية لفيلم «مؤلف ومخرج وحرامي»، ودي حاجة بحبها، إني أكون جزء من العمل تمثيلًا وغناءً.
– هل تبحثين عن نوعية معينة من الأدوار في المرحلة المقبلة؟
أبحث دائما عن الاختلاف والتحدي، ولا أحب أن أكرر نفسي، وبحب أتعلم من كل تجربة.
– كيف تصفين علاقتك بزملائك في الوسط الفني؟
الحمد لله علاقتي جيدة بالجميع. بحب الشغل في جو محترم وفيه تعاون، والوسط الفني محتاج دايمًا دعم متبادل، لأن الشغل مش سهل.
اقرأ أيضاًمحمد سامي: شرف ليا مشاركة النجمة الكبيرة يسرا في بطولة «قلب شمس»
في مسلسل «مناعة».. ميمي جمال تاجرة مخدرات
دليل كامل لمسلسلات رمضان 2026.. كل النجوم والأعمال المنتظرة
